Lidhja e Bizneseve të Kosovës merr pjesë në takimin konsultativ për rishikimin e programeve në Fakultetin Ekonomik

Lidhja e Bizneseve të Kosovës merr pjesë në takimin konsultativ për rishikimin e programeve në Fakultetin Ekonomik

– Përfaqësues të Lidhjes së Bizneseve të Kosovës (LBK) morën pjesë sot në një takim konsultativ të organizuar nga Departamenti i Ekonomiksit pranë Fakultetit të Ekonomisë – Universiteti i Prishtinës, në kuadër të procesit të riakreditimit të programeve Bachelor dhe Master në Ekonomiks.

Takimi synoi përfshirjen aktive të punëdhënësve aktualë dhe potencialë në procesin e rishikimit të programeve akademike, në mënyrë që ato të jenë më mirë të harmonizuara me kërkesat reale të tregut të punës dhe zhvillimet dinamike të ekonomisë moderne.

Në këtë takim, Kryetari i LBK-së, z. Besart Dreshaj, theksoi nevojën urgjente që programeve universitare t’u jepet më shumë peshë punës praktike, përveç asaj teorike.

“Studentët duhet të përgatiten për realitetin e tregut të punës. Arsimi duhet t’i përgjigjet kohës dhe të zhvillojë kompetenca praktike, që nga viti i parë i studimeve. Ne, si sektor privat, jemi të gatshëm të kontribuojmë në këtë drejtim,” – u shpreh z. Dreshaj.

Lidhja e Bizneseve të Kosovës shprehu gatishmërinë për të bashkëpunuar në ndërtimin e një modeli më të afërt ndërmjet universiteteve dhe ndërmarrjeve, duke sugjeruar:

 • Thellimin e partneriteteve për ofrimin e praktikave të detyrueshme,

 • Inkorporimin e mentorimit dhe vizitave studimore nëpër biznese,

 • Rishikimin e kurrikulave me fokus tek aftësitë e zbatueshme në ekonomi reale.

LBK do të vazhdojë të mbështesë çdo iniciativë që forcon ndërlidhjen ndërmjet arsimit dhe biznesit, duke ndikuar drejtpërdrejt në përgatitjen e fuqisë punëtore konkurruese për të ardhmen.